សត្វពស់ដ៏ធំមួយត្រូវចាប់បាននិងបញ្ជូនដាក់ក្នុងសួនសត្វ ~ ពត៌មានពីដុនបូស្កូកែប

Friday, February 21, 2014

សត្វពស់ដ៏ធំមួយត្រូវចាប់បាននិងបញ្ជូនដាក់ក្នុងសួនសត្វ

6:05 PM

Unknown

ពស់ដ៏ធំនិង វែងមួយក្បាលត្រូវបានសិស្សសាលាដុនបូស្កូខេត្តកែបចាប់បាន ដោយគ្មានឧបករណ៍ទំនើបឬសម្ភារៈអ្វីទាំងអស់នៅពេលដែលយុវជនមួយក្រុមនោះកំពុងអង្គុយលេង។ កាលពីវេលាម៉ោង ៣:១៥ នាទីល្ងាចថ្ងៃ សុក្រ ទី ២១ ខែ កុម្ភៈ ឆ្នាំ ២០១៤ នៅសាលាបច្ចេកទេស ដុន បូស្កូ ខេត្តកែប គ្រប់សិស្សទាំងអស់ត្រូវសិក្សាលើជំនាញមួយរួមគ្នា ដែលគេហៅថា អនុវត្តជំនាញពីកំណើត។

នៅពេលនោះដែរមានសិស្សជាច្រើនទៅតាមជំនាញរៀងៗខ្លួន តែសម្រាប់ជំនាញកីឡាវិញ សិស្សជាច្រើនបាននាំគ្នាលេង បាល់ទាត់ បាល់ទះ បាល់បោះ ហើយយុវជនមួយចំនួនទៀតអង្គុយជជែកគ្នាលេង មិនបានប៉ុន្មានយុវជនមួយក្រុមនោះក៏ប្រទះឃើញសត្វពស់មួយដ៏ធំមានប្រវែងប្រមាណ២ម៉ែត ហើយក៏ផ្អើរឆោឡោចាប់បាន ដោយយុវជន មិត្រ ខ្មៅ ដោយការព័ទ្ធចាប់នៃយុវជនជាច្រើនទើបានពស់នោះមិនអាចផ្លាស់ទីខ្លួនរួចពីកណ្ដាប់ដៃនៃក្រុមសិស្ស។

គួរបញ្ជាក់ថាពេលដែលយុវជន មិត្រ ខ្មៅ ចាប់បានភ្លាមៗនោះគាត់មិនបានសម្លាប់វានោះទេគ្រាន់តែធ្វើឲ្យវាអស់កម្លាំងនិង ឈប់រើប៉ុណ្ណោះដោយ ខ្មៅបានចាប់កន្ទូយពស់នោះគ្រវីជាច្រើនជុំ ទើប យុវជនដទៃទៀតចាប់ក្បាលវានិង យកទៅប្រគល់ឲ្យលោកគ្រូ ហើយលោកគ្រូក៏ចាប់វាដោយទុកក្នុង ការ៉ុងប៉ាវមួយ។

បើតាមសម្ដីរបស់យុវសិស្ស ម៉ាញ ដែលមើលឃើញពស់នោះមុនគេបាននិយាយថា "ពេលដែលគាត់អង្គុយលេងសុខៗស្រាប់តែឃើញពស់នោះនៅក្នុងលូទឹកហើយក៏ស្រែកឆោឡោឡើងដើម្បីឲ្យមិត្តដទៃទៀតបានឭនិងចាប់វា"

ហើយបើតាមអ្នកចាប់ពស់យុវសិស្ស មិត្ត ខ្មៅ ក៏បាននិយាយថា វាជារឿងសម័ញ្ញទៅហើយដែលគាត់ចាប់ពស់ព្រោះគាត់តែងតែធ្វើបែបនេះហើយគាត់ក៏ដឹងផងដែរថាពស់នោះមិនអាចធ្វើអ្វីគាត់បានទេ។

សម្រាប់លោកពុក លី សំណាង ដែលជាអធិការសាលាវិញក៏បាននិយាយថាគាត់ពិតជាសប្បាយរីករាយជាខ្លាំងដែលយុវជន ដុន បូស្កូ ខេត្តកែប ដូចជា យុវជន មិត្ត ខ្មៅ នេះផ្ទាល់ដែលមានភាពក្លាយហាន នឹង ចេះនូវការចាប់ពស់ក៏ដូចជាជំនាញពិសេសៗផ្សេងទៀត ហើយថែមទាំងមិនសម្លាប់ជិវិតរបស់វា លើសពីនេះលោកពុកក៏បានសរសើរយុវជននេះជាខ្លាំង។

អ្វីដែលពិសេសជាងនេះទៅទៀតគឺ សត្វពស់នេះក្រៅពីមានប្រវែងប្រមាណ ២ម៉ែតថែមទាំងមានទម្ងន់ប្រមាណ៣គឺឡូផងដែរ ហើយសត្វពស់នេះត្រូវបានលោកពុក លី សំណាង យកទៅដាក់ក្នុងសួនសត្វនៅឯខេត្ត តាកែវ ផងដែរ៕